WAKAKA，呢種開心真係難以形容！
因為之前一路覺得十公里係好長、好難跑，以往最多只係跑到5公里左右，究竟十公里係點呢？無概念。要唔要上斜路呢？唔知道。
加上教會班朋友都唔係跑呢組，要一個人去完成，好似要好大考驗喎！
到今朝要4:30AM起身，有幾分鐘掙扎係放棄嫁－最後諗，算喇，跑幾多，得幾多喇！
一路好緊張，熱身運動都係求其做下，因為附近都好逼好多人！
一個人跟下大隊行下行下，就去到起跑區附近～
起跑之後，可能有分流，我都用左差唔多成五分鐘先去到起跑點！哈哈！實在太逼喇！
跑左一段路後就好D～終於有得跑下，之不過好多人係咁撞上前！難怪大家都話似百萬行多過似跑步！
一口氣用自己既步伐跑左4KM，用左半個鐘左右，原來咁快就回頭喇！
跑到5KM時，天氣好局，好大霧喎，加上第一個水站竟然無杯，我知道自己心口好悶，所以慢慢行行行，仲覺得個人好難散熱！真係好鬼驚中暑囉！好彩我有心跳錶，CHECK住自己太快心跳就減速！加上不斷用毛巾抹汗～幫下手散下熱喇。
到出到7KM左右，離開左大霧位，於是跑多陣，終於見到8KM既水站喇！狂飲！一口氣飲左三支(袋裝) 寶礦力～飲完即刻爽哂～係咁衝呀！！！！！依～～～好快就到終點喇！我望住個FINISH．．．下，到喇？跑完喇？呵呵！
我覺得水站安排真係好有問題囉～點解我地黎到個陣無哂杯？
有人無辦法之下用人地飲過既杯黎裝水，我就學人用手兜左口水黎飲囉！
但係個天氣真係好唔得，大概4KM-8KM呢段路好多人都嗌想飲水，個刻我終於明白點解有人會拎水樽上路！
原來十公里無想像中咁難～加上跑東區走廊～直路真係易跑好多！反而平時係屋企樓下個單車徑跑步仲要跑下停下又兜彎～原來十公里仲易跑！
本來我預期在一個鐘四十分鐘內完成，最後用左個半鍾左右～比預期中快左！
一路跑，諗起大半年前，未開始減肥，成世女好少做運動既我，以前運動堂跑步一定包尾，最最最驚跑步，因為成日都跑到扯哂氣喎，但因為決心減肥，開始接觸跑步機，到跑街，由兩三公里（馬鞍山到錦泰），到五公里（馬鞍山到沙田醫院），到十公里～哇！原來真係做到嫁！！！各位戰友，大家俾心機呀！！！
